DE MENS EN MENS DE TERRAS A FACTURAR

DE MENS EN MENS DE TERRAS A FACTURAR

Se conei a bèus uelhs vesènts ! En Provença tota, son dins lei 3000 ha de terras a cultivar que disparèisson cada an mentre que la susfacia per l'agricultura es solament d'un pauc mai de 20 dau 100 dau territòri regionau de còntra 52 dau 100 au nivèu exagonau. Sus 74 000 activitats agricòlas recençadas en 1970, a l'escala regionala, ne'n sobrava dejà plus que 20 000 en 2007. A la plaça dei bastidas, soventei fes, se monta de lotissaments o de menas de centres comerciaus coma n'i a a molons en perifèria urbana. Ansin, en vendènt son tenament, lo proprietari tòca de còps 10 còps la valor de son ben e en situacion de crisi onte es pas rare que siegue agantat a la garganta, lo còmpte es lèu fach !
A Levens per exemple, dins leis Aups Marinas, tot en aprofiechant dau Plan Locau d'Urbanisme, la comuna a declarat bòn per lo bastir 15 ha de terras qu'èran cultivats e a fach estrena ai paísans en escambi de patís manlevats ai ròdols naturaus classificats, çò qu'es jujat vertadierament escandalós per lei militants de l'associacion de defensa dei terras fertilas. Es una associacion que recampa d' estructuras e d'autreis associacions a l'encòp dau mond agricòle, de l'aparament de la natura, dau comerci en paratge e mai que mai de çò que se ditz -l'economia sociala e solidària-, valènt a dire de gènts venguts d'un malhum ciutadan. Aquelei grops se son federats dins de mobilizacions localas per aparar de terras fertilas amenaçadas tot en constatant lo ritme de folia de l'artificializacion dei terras e la fòrta especulacion foncièra qu'es en juec : lei collectius d'aparament dei terras fertilas cridan seba e vòlon un cambiament mai que necite de la situacion e un aparament d'aquestei terras a vocacion agricòla per permetre en Provença un desvelopament de l'agricultura. Segon lo ministèri de l'Agricultura, d'un autre latz, en França tota, d'aquestei dètz darriereis annadas, s'es engolit dins l'especulacion l'equivalent d'un despartament de terras a facturar. Tot aquò s'es accelerat recentament coma en Picardia bèu promier amb l'arrivada de la produccion de biò-carburants qu'a manjat un molon de tenaments per l'agricultura.

Teiric OFFRE